Ushbu modul orqali siz logistika sohasining mazmuni, vazifalari va ahamiyati bilan tanishasiz. Logistikaning tarixi, asosiy tushunchalari, bugungi kundagi rivojlanish yo‘nalishlari va turli logistika turlarini (sklad logistika, transport logistika, xalqaro logistika va boshqalar) o‘rganasiz. Shuningdek, dunyo miqyosidagi logistika zanjirlari va ularda ishtirok etuvchi tomonlar haqida batafsil ma’lumotga ega bo‘lasiz.

Bu modulda yuk tashish jarayonining bosqichma-bosqich qanday tashkil etilishi o‘rgatiladi. Yuk turlarini (umumiy, maxsus, xavfli, yuklash qiyin bo‘lgan) tasniflash, har bir turga mos transport vositasini tanlash, yuklash-bo‘shatish jarayonlari, xavfsizlik qoidalari va hujjatlashtirish asoslari haqida to‘liq ma’lumot beriladi.

Ekspeditor – bu yuk egasi bilan tashuvchi o‘rtasidagi ishonchli vositachi. Ushbu modulda ekspeditorning kundalik faoliyati, huquq va majburiyatlari, logistika zanjiridagi o‘rni va mijoz bilan qanday ishlashi haqida chuqur bilimlarga ega bo‘lasiz. Real hayotdan olingan keyslar orqali ekspeditorlik faoliyati qanday olib borilishi ko‘rsatiladi.

Xalqaro savdo shartnomalarida ishlatiladigan Incoterms (International Commercial Terms) qoidalari haqida chuqur tushuncha hosil qilasiz. Ushbu modulda har bir Incoterms shartining (FCA, EXW, FOB, CIF, DDP va boshqalar) ma’nosi, javobgarlik chegaralari va xarajat taqsimoti batafsil tushuntiriladi. Qaysi holatda qaysi shart eng maqul bo‘lishi – real misollar orqali tahlil qilinadi.

Bu modulda avtomobil transportining logistikadagi o‘rni, yuklarni yo‘nalish bo‘yicha rejalashtirish, yuk mashinalari turlari (tentli, ref, platforma va b.), yuklash-tushirish qoidalari, yuk hujjatlari (CMR) va haydovchilar bilan ishlash jarayonlari haqida chuqur bilimga ega bo‘lasiz. Shuningdek, xarajatlarni hisoblash va marshrut tanlash bo‘yicha amaliy topshiriqlar ham beriladi.

Temiryo‘l orqali yuk tashishning o‘ziga xos jihatlari, afzallik va cheklovlari, yuk vagonlari turlari, tarif tizimi, temiryo‘l hujjatlari (SMGS, CIM) va xalqaro marshrutlar bilan ishlash asoslari bu modulda o‘rgatiladi. Transport zanjirida temiryo‘lning qanday rol o‘ynashi haqidagi bilimlar orqali multimodal tashish asoslariga ham tayyorgarlik ko‘riladi.

Aviayuk tashish bugungi kunda eng tezkor logistika yechimlaridan biri hisoblanadi. Ushbu modulda yuklarni samolyot orqali tashish bosqichlari, IATA qoidalari, yuk turlari va xavfsizlik standartlari, aviayuk hujjatlari (AWB – Air Waybill) va bojxona talablariga to‘liq yondashuv o‘rgatiladi.

Konteyner yuklari va portlar bilan ishlash, LCL va FCL farqlari, kemalar turlari, eksport-import jarayonida dengiz orqali tashishning roli va hujjatlar bilan ishlash (Bill of Lading – B/L) bo‘yicha amaliy bilimlar beriladi. Bu modulda xalqaro dengiz yo‘llari, port-logistika aloqalari va xarajat tahlillari ham yoritiladi.

Bu modulda bir nechta transport vositalari ishtirok etadigan tashish turlari – multimodal va intermodal transport haqida chuqur tushunchaga ega bo‘lasiz. Har bir bosqichda transport almashinuvi qanday tashkil etilishi, yukning kuzatilishi, javobgarlik taqsimoti va hujjat aylanishi haqida o‘rganasiz. Real loyihalarga asoslangan mashg‘ulotlar orqali bilimlar mustahkamlanadi.

Ushbu modulda savdo va xizmat ko‘rsatishda samarali aloqa qurish, telefon qo‘ng‘iroqlari, sovuq qo‘ng‘iroqlarni qanday boshlash, mijoz e’tirozlariga qanday to‘g‘ri javob berish, professional yozishmalar (e-mail, messendjer) olib borish va mijozni “ha” degizishga olib boradigan yondashuvlar o‘rgatiladi. Modul davomida real holatlar asosida rolli o‘yinlar o‘tkaziladi.

Zamonaviy ekspeditorlikda CRM tizimlar – mijozlar bilan ishlashda eng kuchli vosita. Bu modulda 4Logist platformasi orqali mijozlar bazasini yuritish, buyurtmalarni boshqarish, ish jarayonini kuzatish, xodimlar o‘rtasida vazifalarni taqsimlash va samaradorlikni oshirish bo‘yicha amaliy ko‘nikmalarga ega bo‘lasiz.

Kursning yakuniy modulida yuk tashish sohasida mashhur bo‘lgan onlayn platformalar – Della va TransEU bilan ishlash o‘rgatiladi. Yuk va transport qidirish, buyurtma joylashtirish, hamkorlar topish, baholash tizimidan foydalanish va xavfsiz kelishuvlar tuzish bo‘yicha bosqichma-bosqich amaliyot qilinadi.